На срдечниот пријател и мојот учител, равот ***, нека свети свеќата негова

Твоето писмо од 14-тиот ден од месецот Тишреј го добив, но пријателу мој, зошто не си усогласен со првиот распоред кој ти го дадов, а бараш обновување? Ти реков дека додека не се навикнеш на првиот распоред, немаш право да си правиш други распореди, ни лесни ни тешки и еве ти почнуваш да го забораваш главниот принцип и ме избрзуваш со нови распореди, што не е нешто поразлично од поттикнување на лошиот почеток. Те потсетувам на првиот распоред кој ти го дадов и нека ти помогне Создателот за да немаш од овој момент никаков прекин во служењето на Него, туку само да се издигнуваш сè повисоко и повисоко, додека не се удостоиш за соединување со Него, како што и доликува.

1.       Да бидеш спремен за служење на Создателот околу два часот после полноќ, но не подоцна (т.е. од осмиот час после аравит [1]).

2.       Во првите два часа да работиш со поправање, да чувствуваш страдања заради прогонот на Израел и болката на светата Шхина, првин заради неговите гревови, а потоа со молитви и молби, до десеттиот час.

3.       Од десеттиот час до молитвата – тоа е време за изучување на светите книги, „Берешит Хохма“, трудовите на Ари, итн. Гледај, за да разбереш како што треба и да достигнеш сè што ќе учиш, а доколку не сфатиш целосно, не Му попуштај на Создателот, додека не се отвори срцето твое и не Го разбереш Него, бидејќи тоа е најважно, сакам да кажам – она на што нè советува Создателот.

4.       Да си определиш време за Тора, без прекини за напразни разговори, не дај Боже. Гледај тоа време што ќе го одредиш да не биде помалку од пет часа по ред, а тие може да бидат кога ти одговораат, во текот на целиот ден. Меѓутоа, важно е да не се прекинуваат со никаков разговор и да биде поврзано учењето на Тора. Исто така, внимавај да не заборавиш ништо од тоа учење. Како последица од тоа, ќе се насочиш кон учењето како што треба. Тоа е предодредено во твоите раце и приспособено за тебе на повисоко ниво.

Исто така, можеш да учиш заедно со кого сакаш, во текот на тие пет одредени часови. Но, не зборувај за други работи кои не се поврзани со учењето, дури ни за начините на работа итн. Доколку пријателот не сака да учи повеќе од два или три часа, ти можеш после тоа да завршиш самостојно, додека не дојде крајот на петте часови, а во останатото време од денот можеш да работиш и во трговија. И еве, она што треба да го направиш е пред тебе, вложи напор и работи, а земи Го и Создателот со себе за да можеш да постапиш како што ти напишав и да се исполни во тебе она што рекол Рашби во Идра Зута: „јас на мојот возљубен итн., и сите денови во кои бев поврзан со Тој Свет, со една врска бев поврзан со Создателот, па затоа сега мојот стремеж е кон Него“. Откако ќе поминат неколку месеци, кога ќе се навикнеш како што треба на овој распоред, извести ме и јас ќе ти ги дадам патиштата на Создателот.

Всушност, јас воопшто не сум далеку од вас, бидејќи сè зависи од вас затоа што времето и просторот на никој начин не пречат во духовното. Зошто не го помните словото на Тора, кое јас го кажав на празникот Шавуот за изразот: „возљубениот мој е сличен на газела“, како што објасниле мудреците: „како газела, која бега и го врти лицето свое назад, така и Создателот, кога се оддалечува, не дај Боже, од Израел, ги враќа своите паним на ахораим“. Јас ви објаснив дека кога паним повторно се враќаат во ахораим, односно дека Тој тагува и се стреми повторно да се соедини со Израел. Од ова и во Израел се создаваат тага и стремеж за соединување со Создателот, а и страст и копнеж во иста мера, што всушност се самите паним. Како што е речено во молитвата „Бархи нафши“, која ја составил равот Јехуда Галеви: „За ликот на Создателот е молитвата твоја (душата моја), кога трчаш за да побараш прошка од ликот на Создателот“. Затоа најважното средство тогаш е постојано да се зголемува тагата и копнежот, бидејќи во тоа се открива ликот. Амин, нека биде волјата Негова. Праќај ми повеќе писма бидејќи тоа ќе ти вдахне душа.

Јехуда Лејб, син на мојот учител и рав, Симхи Ашлаг

[1] На вечерната молитва